這張牌重複出現，令我坦然接受好與不好的可能性。

一直對占星看相的事興趣不大，一來有點自視過高，認為只要信自己好命，就會好命囉。有事情想不通，買本自助書看，Google一下，就可以拆得掂，懶有科學精神。

對預知未來，亦無乜興趣，如果測得我事事順境，咁我努唔努力好？如果測得我短命早死，咁出唔出街好？為了不浪費能源多想，還是活在當下，現在一刻，想點就點，保持樂觀，加少許貼近現實的理智，不會錯得哪裡去。

可是，近來有事很煩心，情緒思緒反覆得要命，恰巧一樣心煩的朋友找到了相熟的塔羅師兼本人師弟J看塔羅，好，就捨命陪君子。

看完，第一個領悟，是以後如果未試過一樣很多人都信和讚的事，不要為了型而誇下海口：「我都唔鍾意乜乜乜，好似點點點咁。」例句：我都唔鍾意睇塔羅，好似好靈異咁。

根據友人解釋，原來塔羅不是預測未來，而是根據你當下的內心想法推論一個未來。即是下一次睇的未來跟今次的未來可能不同，因為你內心的想法永遠在轉。

剩聽這點，已經釋然，一下子省卻我內心很多的what-ifs：如果十年後我不這麼想呢？如果我現在想的到頭來是錯呢？如果咁咁咁我的反應不同了呢？真係唔好煩，到時先算。

J一開牌，思量了一會，偷笑了一下說：「做女人真係好慘！」知道哩？青春限期迫你在指定年紀跟人生賭大細，還未說社會容許女人做的選擇，多麼的少，沒創意又沒彈性。

J說了一句，令我叮一聲：「其實，你不是很怕衰的吧？」

係喎。以前遇過倫敦金、model試身、傳銷騙案，別人阻撓還是樁個頭埋去，喜歡有血有肉親身體驗才甘心學精。犯太歲從沒有消災念頭，反而相信人生間歇來場大變，只會變得更強。學鋼管舞這些年還是很想跳，也跟不怕瘀有關吧。

聽J一席話，內心變得澄明，再沒有哭。想起一句諺語：「我們不斷問人家意見，其實內心早就知答案，只是不希望知道而已。」（Advice is what we ask for when we already know the answer but wish we didn’t.）

明了。